مـــنــتـديــات ســـــــودانـــــــا الــــحـــــبـــــيب

عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي
المواضيع الأخيرة
»  أسباب الأرق عند الأطفال
الإثنين فبراير 14, 2011 10:33 pm من طرف محمد مصطفى

» الف مبروك علينا منتدى سودانا الحبيب
الأربعاء فبراير 02, 2011 10:02 pm من طرف محمد مصطفى

» تم فتح باب الترشيح للاشراف!
الأربعاء فبراير 02, 2011 9:33 pm من طرف محمد مصطفى

» معا لنرتقى بمنتدانا الى الافضل
الأربعاء يناير 26, 2011 4:07 am من طرف محمد مصطفى

» لماذا اراك على كل شي
الأربعاء نوفمبر 24, 2010 6:46 pm من طرف اريام

» البروفيسور.د.فــــاطمة عبد المحمود
الأربعاء يونيو 02, 2010 12:55 am من طرف Hind

» اعانى مصطفى سيد احمد
الأحد مايو 02, 2010 3:14 am من طرف ساره علي

» يا [you] ترحيب...
الجمعة مارس 12, 2010 3:34 am من طرف الهجام

» ماهو المعني الحقيقي للصداقه وهل يمكن ان تتحول الي حب او اعجاب
الثلاثاء فبراير 23, 2010 6:30 pm من طرف طه

» نصوص مفقودة
الثلاثاء فبراير 23, 2010 5:34 pm من طرف طه

بحـث
 
 

نتائج البحث
 


Rechercher بحث متقدم

تسجيل صفحاتك المفضلة في مواقع خارجية

تسجيل صفحاتك المفضلة في مواقع خارجية digg  تسجيل صفحاتك المفضلة في مواقع خارجية delicious  تسجيل صفحاتك المفضلة في مواقع خارجية reddit  تسجيل صفحاتك المفضلة في مواقع خارجية stumbleupon  تسجيل صفحاتك المفضلة في مواقع خارجية slashdot  تسجيل صفحاتك المفضلة في مواقع خارجية yahoo  تسجيل صفحاتك المفضلة في مواقع خارجية google  تسجيل صفحاتك المفضلة في مواقع خارجية blogmarks  تسجيل صفحاتك المفضلة في مواقع خارجية live      

قم بحفض و مشاطرة الرابط انـــــــــــا ســــــودانــــــــــــى على موقع حفض الصفحات

قم بحفض و مشاطرة الرابط مـــنــتـديــات ســـــــودانـــــــا الــــحـــــبـــــيب على موقع حفض الصفحات


مكتبة أشعار حميد

اذهب الى الأسفل

مكتبة أشعار حميد

مُساهمة من طرف أحمد ودالأحمر في الخميس ديسمبر 03, 2009 1:28 am

نرجو من الجميع لكل من يملك قصيدة للشاعر محمد الحسن سالم حميد
وضعها هنا ..
ودمتم
[b]
avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الخميس ديسمبر 03, 2009 1:30 am

رسائل ست الدار بت احمد جابر
للزين ود حامد
( تلغرافات )

( جواب أول )

باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات والحيكومة السمها فاير

أم أولادك ست الدار بت أحمد جابر

ست الدار بت أحمد كيفك
جاني جوابك مفتوح شارع
جاني جوابك وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني يا اخيتي ومرتي وامي وأم الكل
أنا بندهلك من شارع الله .. فوقي هجير والتحتي بقل
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد
جاني وفد في المصنع زاير .. وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا ... سيرو موكب صامد وصامت
إتضامنا معاهم سرنا ..
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة .. والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع .. مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي .. وكل وجوه الراسمالية
وأشرف من ..............
داك الحين المصنع هاج
جات عربات اللات بوليس .. فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان

( بعد الحاصل والإتحصل ست الدار بت أحمد تكتب ) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض .. بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات .. مرتاً دغري وغلباوية
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو .. فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
طالو الناس التريانين .. ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الخميس ديسمبر 03, 2009 1:33 am

عيوشة


منبوشة .. منبوشة
نبشوها قبالك .. بت حالا زي حالك
عودها إنبعت حرقان .. زي شتلة معطوشة
عينيها رماشة .. أم لمبة فتاشة
من طاقة جاتا الريح
كتر البكا .. التجريح
خلاها دعموشة
تلوشة .. واللا ضفاف
خيم عليها جفاف
زي صرخة الغرقان فوق موجة بين فيضان
شعراتا منفوشة
وشفع مبارياها .. عيوشة .. عيوشة
الليل هديماتا .. وشمش الله برطوشة
تشرب من الشارع .. تاكل من الكوشة
عيوشة .. عيوشة
وترقص لهن رقبة ، صقرية ، جابودي ، السامبا .. كاروشة
عيوشة .. جامايكا .. الهورس عيوشة .. اسلولي عيوشة
وعيوشة ما بترقص .. لكنها الدوشة
وتفلت من الشفع
في الفلتة تترتع ..
تدخل على بيتاً .. ستاتو منمدِّي .. ناساً بعرفوها
لكن بعافوها
دايرين غسيل عدي .. شاكرين يا دقلوشة
ويدوها عيشايي بي دمعة مرشوشة
وتنملك الشارع .. خطواتا مربوشة
السوق مع الأطفال .. عيوشة .. عيوشة
الليل هديماتا .. وشمش الله برطوشة
تشرب من الشارع .. وتاكل من الكوشة
عيوشة .. عيوشة
على قدر ما كاست .. عينيها ما لاقت غير مطبقة وبصلة
المطبقة انهردت .. والبصلة مقروشة
ما قلنا مغشوشة
غشوها قبالك .. ديشك يا عيوشة
يا الحاضر الغايب .. في الدنيا ما جايب خبر المدينة الكان
على رغم ما فيها من فاقة من حرمان
مرات اياديها تعطف على الإنسان
بي فكة في قروشا
بي كلمةً طيبة .. بي فضلة في مطعم او برتكانايتاً ضرباني في كوشة
والليلة بانت زي .. بيتاً في آخر الحي .. ناساتو منبوشة
يا جرحنا الحايم .. طول النهار هايم
يلبد إذا ما شاف صحبانو مكشوشة
يضحك إذا الكومر .. قبل على كوبر
واللا المديرية .. ينمطق الفرحة .. بس فرحة مغشوشة
إن تنجا من كشة .. دردير وتلتيلة ..
كيف تنجا من جوعة .. من بردها وليلا
عزت برنداتا واوكارها مطروشة
بيت الله قافلنو
مستشفى غافرنو .. ساحاتو مرشوشة
كم يوم يعز النوم
رغماً عن المشموم .. والدوخة والدوشة
دي مدينة ما هيلك
مافي البيشبهلك .. ما في البناديلك
لافي البخاويلك
غير ناس أحاويلن قطعن أحاويلك
أصحابك الساعتك لا بد يعاينولك ..
صمتاً يجيبولك
باكر تلاقيهن .. في وجبة فوق كوشة
جنب مجرى يحكولك
ودونا لي ضابط .. كالعادة وانكفرن قال وين أوديهن
والعندي ما قادر بالموية أكفيهن
والعسكر أدونا
سوطين وفكونا
كالعادة يا اخونا .. حيكومة مربوشة
دايرين شغل .. مافيش
غير نغسل العربات غير نضرب الاورنيش
حمالة .. جرسونات .. شغلاً ما يوكل عيش
وبالحالة دي الكشة
بلدية والبوليس ... مرات يجيك الديش
ما يقبضوا الباعوض .. ما يقبضوا الضبان .. الما بدور فتيش
الارزقي السمسار .. إشمعنى نحنا وليش
إحنا الحرامية واللا البدسو العيش
الزول يخاف يكفر .. يرجع يقول معليش
شقيش تقع شقيش .. حتى السجن مافيش
مافيش يا عيوشة
من تكبر آهة وآه
وآدم بدور حواه
الطيرة بي عشوشة
الفارة بي جحارة .. الكل بي مأواه
وهنا في إبن آدم تاه
ملجاه أرض الله
لا أوضة لا حوشة
يا أبونا يا الأسود
يا أمنا القرقد
يا داجي وين نرقد
جاك المحل قاسيت .. لامن هجرت البيت
حين المطر صديت ..
أو صددوك غصب
دارك لقيتا حرب
كرت عليك فريت .. كان مافي غير تنفد
بي لونك الأسود .. بي شعرك القرقد
وبي فالك الشامخ زي تاج أبو الهدهد
لامن يطير في الجو .. من ها المدن ينفد
حاشاك من عيب تب
لي شينة ما ختيت .. دغري وعراض إيديك
بس كفها إتعود في الأرض يرمي الحب
ما قنبلة وديناميت
جيت المدن لاقيت
من سيدا ما لاقيت
تحرس عماراتو .. عطشان تمسي تبيت
يتربو زي ما ربيت
كم للعرق شديت
زوغت أمن .. كريت
جاملت جاراتو
أو تنوم ترحل لي سيد خلاف السيد
يتغيروا الأسياد .. لكنو نفس القيد
نفس الربط ذاتو
يا ماشي دون راس خيت
وين كنت لما الناس إنقسموا الواطة
في مدن تجز الراس كان سيدو ما طاطا
كت مافي واللا أبيت .. واصبحت مقطوع راس
زيك كتير من ناس لا أوضة لا ضل بيت
وفتحنا لاقيناك .. أول ما شالنا الحيل
بالراحة في ذات ليل
يا أبونا خليناك .. خففنا ليك الشيل
تقلت بنا الخرتوم
وفرنا لقمة عيش .. موية ومحل للنوم
سامحنا .. عافينا .. يا أصلنا الحنّان
غيرنا اسامينا شان نحيا باطمئنان
دينق إنقلب عثمان .. هاشم بدل دلدوم
من وين ؟؟
من ام درمان وناس بيتنا متعارفين
بس لكنة الرطّان تفضحنا .. بعض الحين
وإن كنا يوم في يوم ماشين بننعوّد على لهجة الخرتوم
في ولاد عرب بالكوم
طالعين سوا ونازلين .. يفرقنا إلا النوم
الحالة من بعضا .. مطروش ومطروشة
أكوان ونتقابل .. في كوشة عيوشة
يا التحكي دون تبكي .. وفي وشو بتعاين
شوف فيهو شن باين .. غير دمعة مقشوشة
قشوها ناس أخوان .. أكوان وعيوشة
بي صبر كم طول
على حال حا يتحول
قصر الزمان يا زول واللا الزمن طول
لا بد يتحول
ما فيهو من آلام .. في يوم من الأيام لي دنيا مفروشة
بالعافيي والطعام لي كل فم .. ما دام في غلابة بي ديوشا
ولي غادي فيلا وكتر بوشة
تحت حكام مندلدلة كروشة
فاوة وتفل لاقّي
ونار الغضب باقّي
غالاها محموشة
جرفت لبقة الليل وانطنبجت دنياك لا عينا بي رموشة
الحال حا يتحول .. قصر الزمان يا زول واللا الزمن طول
لابد من فوقة .. ومن تنتهي الدوشة
قولاً قبل قلنا .. وكتين نصر نحيا مافي اليكتلنا
قولك يا عيوشة .. لا نفس طماعة غاشاك ومغشوشة
الدنيا دنيانا
زرع إيدنا تربانا .. لا صيص لا كدموشة
وماك ماشي جيت غاشي .. ليكن ينسبّل
لا كُتّي شحّادة .. نديل وتتوكل
لا جيتنا دنّاعة .. نمسح لك الجردل
أخرت للساعة وتلبت في حوشة
في إيدك المنجل وشوالة مغموشة
ناسي انو مزروبة ..
بي شوك وجنية وحارساها كلوبة
وكلوبة بات ووبة .. ويات لوبة بتحوشة
يا النفسو ماهية
شن جبهة متكية
لي عمة كاكية .. وطاقية طربوشة
جنب جبهة دغرية .. العمة مكوية .. فوق راسو ملوية
ترقش بياض نية .. وبالهيبة منقوشة
زي وشم فوق أكوان .. شلخاً في عيوشة
يا جرحنا الطول
جاييك زمن طيب .. خيراتو ليك أول
صدقني يا طيب .. يا أرض ويا جدول
كارتنو بي معول
والليلي تتجول .. عينيك مدهوشة
من كنت تتسول .. في مدينة ما هيلك ومن كوشة لي كوشة

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الخميس ديسمبر 03, 2009 1:35 am


نورة والحلم المدردح

هي .. أقيفن ..
نورا فيكن ؟
نورا
نورا نقَاحة الجُروف
نورا
نورا حلَابة اللَِبيني
للصغيرين والضيوف
نورا
ساعة الحر يولَع
تنقلب نسمة
وتطوف
تدًي للجيعان
لقيمة
وتدًي للعطشان جِغيمة
والمخلَي الحال
مصنقِر
في تقاة الليل
تدنقِر
تدَي لي باكر
بسيمة
تكسي للماشين عرايا
وفوقا ينقطع هِديمة
..............
ما عرفتن ...
نورا إنتن ؟
قولن إنتن شِن عِرفتن ؟؟
نورا
بِت الواطة
أخيتي ..
نورا
أُخت كل الغلابة
نورا
حاحاية الشَقاوة
نورا
هدَاية الضَهابة
الأراضي الياما أدت
نورا ....
بقَت في تُرابا
وماشي في الأعماق
سحابة
مُشتهنَها ...
والله جابه
الله جابه ..
الله جابه ..
للجنوب طبلاً
يهدهِد ..
ليل مشاعر
ناس تعابة
وللشَمال طنبور
يسكَت ..
دمعة الميتين
كآبة
..........
ما عِرِفتن
نورا
إنتن ؟؟
قولن إنتن
شِن عِرِفتن ؟؟
...........
نورا ..
عايز تقرأ
قالت
فوقا حِيطة الدَُنيا
مالت
ختَت الكراس
وشالت
مُنجلاً ...
صالتبو
جالت
لامِن إنجرحتبو
شالت للتراب
فوق إيده
كالت
.............
مرَة يوم
في الدَُونكا لِدغت
جا الفقير
بالليل حواها
ويوم ملاها الهم
قطايع
جا البصير
بالنار كواها
ونورا
ما قدرت تمانع
تقنع الناس
المعاها
مرة شافت في رؤاها
طيرة تاكل
في جناها
حيطة تِتمغَى
وتفلَع
قفا الزول
البناها
في جِنينة سِيدي
سِمعت
شتلة تصقع
لي الوراها
دي الأرض
ولا بُدَ
ترجع
للتِعِب فوقا
ورعاها
غيمة ..
والنيل موجو
لاها
والعطش شقَق شفاها
الشمش ..
طبقت ضُحاها
الخلِيقة
لِقت إلاها
نار ...
عقاب إنسان مُكسَر
فوق تلكِيات متاهة
وضو من الله
رِهاب
مكتَف
في وِتيد الليل
معاها
بين ربوع حضره
وخلاها
فسرت للناس رؤاها
وقالو
جنَت ...
ومو براها ...
ونورا
زادت فوق شقاها
وصدَت الأيام
تحُش ..
تبني لي عصفورة
عُش ...
في السَواقي تشوف عزاها
لما شوقه يسوَي
أُش ...
تملا
تزرع
ترعى
تقرع
للنهار في الليل
تخُش ..
عِرفت الشقا
والشقاوة
إلا ما عِرفت
تغُش ..
.............

شايلة طولة البال
من الله
ومن أراضينا
الإثارة
وماشي تكدح
طول نِهاره
وترجى لما الليل
يفلَِل
تسرق ألمي
عشان خداره
عشان صِغاره
عشان خداره
عشان صِغاره
ولما ترجع لي دياره
تنزف
أحلام الفقارى
من عويناته
الحيارى
..............
..............
لي غُبار الحال
تقُش
فوقو للآمال ترُش
نورا
تقعد
صاحي
تحلم
بي بيوت
بى نور ودُش
وبالمحبة تشُق دروبه
ولي قلوب الكُل تخُش
نورا
تحلم
بي وجود
مامشت بينو
القيود
أفضل
أفضل
بي الكتير
بي وطن
من غير حدود
...........
.................
نورا تحلم
بي عوالِم
زي رؤى الأطفال
حوالم
لا درادر
لا عساكر
لا مظاليم لا مظالم
.............
................
....................
نورا تحلم
ولما تحلم
نورا ترجِف
ولما ترجِف
نورا تحلم
ولما ريح الواقع
المُر
لي عِشيش
أحلاما ينسِف
نورا
تنزف
وفي الوجود
وجدانه يهتف
حالة تقرِف
حالة تكسِف
حالة تكسِف
حالة تقرِف
وتبدأ تقضِف
ولما تقضِف
حاله يهتِف
وتملا باله أحلام
بتلصِف
يوم
حتنصِف
يوم حتنصِف
نورا
لسَه
بعيد هناك
صاحي تحلم
ولما تحلم
نورا ترجِف
نورا تحلم
صاحي تحلم
وصاح بتحلم
صاح بتحلم
بتحلم صاح
................
...................
............................
avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف الهجام في الخميس ديسمبر 03, 2009 3:37 am

احمد مشكور علي المكتبة الرائعة و محمد الحسن سالم حميد احد شعراء الشوايقة المبدعين..

سوقني معاك يا حمام



سوقني معاك يالحمام
سوقني معاك يالحمام

... ...
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ماالمحنة
وأيادي تقطر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام
فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقراية
خزين مدخور للجِسام
تتمر نيتو التخاية
إلاما مذهلل إلام
درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
... ...
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
... ...
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام
avatar
الهجام
الادارة
الادارة

السودان
ذكر
عدد المساهمات : 15
34565
السٌّمعَة : 3
تاريخ التسجيل : 09/10/2009
العمر : 36

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الخميس ديسمبر 03, 2009 7:45 pm

عَبيّت زُوادتي
عَبيّت زُوادتي الرّيقة من بايت القَوَى ..
بايت القَوَى الوطن الدّشَرْ ...غيمو الرّبَطْ
ساعة بقينا من الرّوَى فرسخ مطرْ
سافرت ليك بأشواقي في كل المنافي ..
بَحّتَّ في كل المخافي ..وكُسْتَ عَنِّك في الخُرَطْ
في التواريخ القديمة .. التواريخ الرؤومة
بين رموز نبتة ورسوما
في الطّنابير العظيمة
وبين لُغة مروي القديمة
راجعتَ بيك كل الاسامي البعرِفا
كل الُّجمل .. حتى الضمائر واحرفا
صححت بيك زمني الغلطْ
باخَتّبِكْ قلبي الشّقِى .. وبشرتو بي لُقْياك عَبَطْ
يا طيبة زي شارع وَسَطْ .. يمشيبو كادَح وارزقي
وممتنعة زي قبض المياه والمافي والما بتلقي
غالِبني جيتك اصادفا
لا في المعابر والموانيء المترفة
لا في المطارات الوسيمة كما الفراغ .. لا الارصفة
كل الدروب التعرفيها وبعرِفا
التألفيها وبألفا
خَشّيت دغيش سِعْن الدِّني المرفوع على سِيبات وفا
رَوّابي كان قُطّاع غني .. وشوقاً مَفورِن وانكفى
قِدّام خُطى الوجد الِحفى
غابت صباحات القُرُب وبَقّت ضلامات الجفا
و ضَي المصابيح الجريح .. كِترْت علي الرّيح وانطفا
هوي يا بِنيّة من الغُبُش .. من حر أباطهم مُترفة
وين انتي شان نرقد قَفَا
وين انتي وين .. ما بيننا بين غيبتك كفى
لو بَقّ حِسِّك في هشيم دبش الضياعات والسأمْ
زي أغنية شوق زي نشيد اندبّ همسِك زي نغمْ
او خبّ خطوِك زي شهيد .. رَفّتْ مسيرِتِك زي عَلَمْ
ما كان مهابات الصقور (نخّت) تحت رخّة رخمْ
وين انتي وين ... ما كان هجم ديش العجم والدِّنيا ضو
وامسن سبايا الاغنيات العُزّل الآه شِنْ تسو
لافي الكفوف الخاوية سيف ... ولا في الكتوف الزاوية ضو
دَلّجتَ درب الاربعين .. صاقَرْ قوافل الرِّق .. حِفيت برّاً وبحراً حتى جو
اشريكِ قُلْتَ من الزمن واعتق معاك رِقّة مشاعري ازوِّجك كل الوطنْ
كل الرِّجال الحملو ارضك بالحلال ... وافتق سحاب العشق شو
ولا بنتي في الزِّنج البجم ... لا كنتي في العرب الأشو
لافي شلوخا .. ولا الوشم .. لا في شيوخا ولا في عو
بل فيكِ غشّاني الزمن ادّاني صرصر وبعتو نو
انترتَعَت رؤياي .. هَكَعْ .. ما بين أريت يا ام زين ولو
وبين تبقي وين .. لاكْ في الوجود لا في العدم
لا في الحقيقة ولا الوهم
لا زين لا شين لا البين بين .. يا راحة الباقالو هم
لا عنك افتاني الزمان .. لا منك انقطع العشم
آ ريتو اغناني الكمان يا طيبة عن صوتِك نغم
من أعلى ميضنة فيّي كان اعلنت موتك للأمم
أو صِحْ بجيتك لى الرِّمَمْ
لكنو صمتك طال وكان ميعاد زفافي على الألم
قلت ارفع ايديني واقول ... خاني الصبر .. خان وانهزمْ
زي ما انهزم كمين نبي وخانت على التاريخ ذِممْ
يا طيبة اخافك واللاّ اخاف السُّبة واللعنة الوبيلة
تحل وراي كما الجفاف أو..... تار على اكتاف قبيلة
معلم الله من عتاد .. يبرد حشاها ولا في حيلة
يلاّ نأمل في البُعَاد سنين ودنين طويلة
وكيف وكم
والإنأخد بالدّم غَصِب ... مافي البرجعو إلاّ دم
يا طيبة هيلة .. سلام عوافي
أيا بديلة عن اللِّي مافي
يا أدخلي على غُنانا .. يا أمُرقي من القوافي
يا أحذرينا وما تخافي
وما بنخيّب حاشا ظنِّك ينفخوها وما بتموت
حية نارِك ... حية يوت
خُتِّي قدرك في الأثافي .. يوسف الفي الُّجب يمرق ضاربا ريقة اليلقى قوت
روقي كَنِّك .. واللا كَنِّك .. تاوقي في البحر الخرافي .. يونِسِك في ياتو حوت
سَمّ ينده جوفو حافي .. وهِّطينا على الأثافي.... وهِّبي نارك لا تموت
يا حمامة غار محمد .. يا خيوط العنكبوت
يمة كسناك ضمة مافي .. الدروب وين غيبنك ..
في سؤالنا الضّارِي عَنِّك سَدّن ابوابِن بيوت
والبيوت البشبهنك .. انكرننا وانكرنِّك
ننفضح لا لوم عليهن .. بس ها كيفن يسترنِّك
في سُكاتنا الجاري مِنِّك
رحّبنْ بينا السجون والبيوت الماها منك
الدرادر والمنافي
فينا مَنْ روّح فدايتك ..
وفينا من لا زال ... وفينا مافي من بدّل لرايتِك
وانتي في ذات السكون
التراب يتشهّى حِنّك .. السحاب عابر يفوت واللاّ يكمُد للعيون
بالغبار غُمّة وسوافي
وانتي يا آخر المرافيء
يا ام وجوداً بات خرافي
في صحاريك داخ غفاريك من برد زمنو الرِّعافي
دون كواريك .. مات واتاريك غبتي بي كل المدافيء
يا لساريك لاك موافي
ولا كمان قادرين نسيبِك نمشي في الزمن المجافي
وما عهدناك عاد تخافي
لوحة التاريخ بيشهد لونا والدّم الإضافي
الاّ يا وتري وغناهو ..
يا نبي الثورة الغشاهو برداً أكتر من غُتَاهو
الاّ يا بِتْ جاك زمن لابس الأيام قُلُب
الدّفاتر والكتب
إستحمّن بالغلب
التلاميذ النجب .. طيشا الفقر .... الغبينة
صنّت الأجراس وجينا
إلاّ يا أخ ما لقينا
الجوامع مستباحة .. والمصلّين صَرْ جُنُب
والكنائس جالبا دينا
والمدينة تبيع عوينا
لي النخاسية الغُرُب
واللُّحاسية وعُقُب
تشتري افلام الرُّعُب
والهتافات الجُرُب
عربدت باسم السّما .. توّكت ريح السُّحُب
وكل أطفال الفقارى .. فضلتلها فد شُخُب
في الوقار الفاوه سُبْ
واللاّ اريت ما كُنّا منك .. واللاّ بيناتنا القُرُب
كنا اقلاّ نشوفو عادي
التردِّي الجاي وغادي
سادي في النعم الزيادي
وابن ادم بالايادي
لى سترة الحال يكافِت .. غابة غابة .. ووادي وادي
ينبح المسكين يا طيبة .. طيبة يا راحة الفقارى
وواحة الفي الصّيْ حيارى
عورة الشُّرفاء الفقارى
وسترتها ولُب المباديء
يا بنية الأُجّر ام خير ..
أو نبية الشجر الطير ..
يا رسول البسمة للاطفال بشارة نيل بلادي
يا طليقة الغيم عروس طين البوادي
المناديل بانتظارِك والايادي
معبّا شوق .. يا طيبة .. طيبة .. ولا حياة لمن تنادي
بُكاك بكيتو .. سَكَتْ برايا
كنت حافي على إبر .. بِتّ حابي على شظايا
من كُتُر تعباً تعبتو .. قلت ألقاك ما كفاية
يا أدوب بالمرة بينِك .. يا أكمِّل فيك غُنايا
انتهت كل الخفايا
انتهت كل المحاسِن ... رُحت اكوسلِك في الخطايا
لمّا في ذات لقيا حِرْ .. وزاد هواكي على هوايا
وقمتي خنتيني معايا
اشتكيتِك لى القمر
لما انسام السّحر
الرياحين والزهر
شهدوا ليّ عليك يا اخيّة
القمر سوّاك بريّة
باعتزاز بى نبرة حيّة
صاح في جمعنا يا بريّة
من يكن من غير خطيّة
وقُمْ رميتِك باللِّي فيّ
من المحبة فيا وفيّة
يا معاكي تغيبينا .. يا تعالي وابقي جية
للبعيشو غَصِب عشانِك والبموتو بحسن نية
مُرْ علينا بعد طراوة وبين عيون احباب تقية
نبقى في كتمة وشقاوة وبين عساكر وارزقية
كفاك شكية
يا التّشرِّكْ لي غمامك وتحتَك الانهار قوية
ما انسرق بالليل سنامَك لو قبيل كُسْت الحوية
كفاك شكية
وما بيضيع حق لا قضية
لو في طُلاّب من وراهو ونية بيضاء وبندقية

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الخميس ديسمبر 03, 2009 8:08 pm


عروس الطين
محمد الحسن سالم (حميد)
بيني وبين النهر ضحايا وكمّين قتلة ونصّابين
وقدر الغيم اللمّا سمايا .... شالوا الريح وبي حُمرة عين
حبل البئر ودلوها منتّف ... وحارستنها دابيين
ريقي دقيق والخطوِ مكتّف ما بين كهنة وربّاطين
وانا ناذرلك كان أسقيك وترجعي طيبة عروس الطين
ويرجع عصب العشم الفيك ... وزي ما كان من قبل سنين
يا ترقوة الحلم الزانك ما أقواك على السكّين
لما غِشَاكِ الصيف الحارق حتحتيهو الصفق الأصفرْ
والنوّار اليا دوب مارِق علمتيهو تمام ينضرضرْ
فرعك عز الزمن الزانق عاهد ليفك وابى من يكبْر
عشان ما يبقى حُراب ومشانق واللاّ مطارق في ايد العسكرْ
وشان الساق الناجرو الخالق ساترو لحاهو يفضل أخضرْ
روّضتيها جذورك ترحل تالا الموية التحت الأرضْ
وفوق الزمن الريحي الأمحل كيف تتشايل وتسند بعضْ
ما كان عرضِك الا الطُّول .. لا كان طولِك غير العرضْ
وين بالساهلة يفرِّط زولِك واللاّ يفوت المال والعِرْضْ
قال طيراً نفد بي حِنّو ... لى جملة عَقابو يغنوا :
يا أكباد الرفاق لا تئنو
طرِّقوا لى المناقير سِنّو
شن طعم العرق والدم واحنا عوجنا ما عدلنو
هِبّن آ طيور من جم .... رخمتين فوق صقر كتلنو
حلماً زانو ليك كابوس ... وراجنبو الليالي يصِنّو
والوعد المشتت روس ..... وكاويق شن بترجن منو
وما بتنغشّن ... حاشا وحاشا
وما بتنكسرن أي والله وما بتنزلّن لي حباية ودود معقود في شبك الباشا
وكم هبّرتن شركو وطِرتَن لي قندولكِن في الحواشة
وقلتِن شارق فجراً حارق وكل الوخم الزيف يتلاشى
تنفض طيبة غبارا العالق وتقبض نسمة خير ودعاشة
وبيني وبين النهر ضحايا وكمين قتلة ونصابين
وكل الغيم اللمّا سمايا .. شالو الريح وبي حمرة عين

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الخميس ديسمبر 03, 2009 8:11 pm


كرويّات

كرويّات
الصبر البيضاء
إنهزمت
وجمت
وخرّ
قبل يقرِّب
حُميّات الغلبة السوداء
إنلمّت غمّت
وغزت جسمك
وبدت تهضرب
ومن هضريبك
ومُر تعذيبك
بين النخلة
ومجرى النسمة
إتساقط طائر
فتفت
حتحت
ريشو قصادك
وقَعت تجقلِب
وبين القيفة
وباب النهر
دبيب الريح
من ديش القهر
إتلوّى إتلبّد
ولدغة شيمة
الشيمة إنكفّت
البحر إنخجّ
الزبد إنعجّ
الطين إنحترب
ومرقت عقرب
ورفعت شارة
إندفعت فاره
تجاه المركب
ووقعت علي صنقور
رواسي قريبك
وقام منهودب
وكابسو جندب
زكان بنجادك
بين الميضنة والإرصاد
إتجرحت غيمة
الغيمة الطيبة
وحاملة حلال
من ألق البسمة
الفي الأطفال
ومن عرق النسمة
الفي العمال
والناس الفال
إتسرحت فيها
شظايات الوقت
الواقعيبن تقريبك
وسرقة ذادك
مدت إيدها
تالا القبلة
رشاشها يصيبك
تسوي نديهتك
تفقد جيهتك
تنزف
تنسف
دانات دعة الهوس الديني
الطيني الجيني
قوافل أورادك
تقطف
تركض
تال أولادك
ونعش جنازك
باري نحيبك
ترجف ... تتعب
تغضب ... تهتف
تلقى قصادك
سد مرابي
أرزقي
ربّاطة
وكوم همباتة
لحى ونخاسة
وكل الساسة
الباعو نصيبك
بإستشهادك
عاد إنشا الله
تكون الجنة الماهلة
ميعادك
إلا الحاصل ديل حُسّادك
بعض يقول الله لا عادك
بعض إن لاقي طريقة
يعيدك
تاني
عشان الموت يصطادك
يا مجلوب في سوق الآخرة
ويا متقلِّب تحت جهادك
خرَّ جوادك
ومات الطائر
ما تضاير
لدغة شيمة
كرش الغيمة
إنبعجت
دمت عينك
تنكر سيفك
تابا جفيرك
دابك تقوى
يا بني آدم
تفقد مرّة مريره ضميرك
تكسب ثروة
وتلقى العالم تحت سريرك
تشبع ... تروى
وترضع ذاتك
من لذاتك
وحلو الحلوى
من ما تبلع يوت
تتبرى
وكلك نخوة
صدقة لي عمرك
وباقي حياتك
ونصر الدعوة
حبة جوامع
وحبة صوامع
كوتة
وكوتة
تفوت الفوتة
بأسرع صهوة
عُمرة وحجّة
وتسأل ربّك
يقبل توبتك
يغفر ذنبك
يمسح سفك
خيرات شعبك
أصلها كانت عترة في دربك
لما تعِبت
وفاتك حِزبك
الما ضهبت
وخانك قلبك
كانت هفوة
في لحظة سهوة
عن الإنسان
والحال الأسوأ
ودابك فُقت
وجاتك صحوة
وجيت تكفِّر
يا رب تغفر
أغفر
أغفر
عبدك خاسر
شئ ما بيسوى
وإنت القادر
إنت الأقوى
يالبتخادع حتى الله
وين الشهرة
المال والجاه
وين السطوة
الجشع القسوة
أركِز أركِز
لا تجيب رخوة
وأركض أركض
تال أشجار العملة
واقطف من أوراقها
يمكن تستر عورة شينك
وما سواه زمانك جملة
أركِز أركِز
لا تجيب رخوة
أركز أقوى
ولِف بشكيرك
فوق الراس النشّف غيرك
لاتستهوى
قضِّي منافعك
تِمّ العُمرة
وفوِّر موية زمزم قهوة
أركِز أركِز
لا تجيب رخوة
ماك غلطان
غلطان الشعب
الجزَّ جراد الغفلة
كِفاحو
الجنى أرباحو
ضياع أرواحو
وجيد للحاصل
وبخت الحاسد
وماك غلطان
غلطانين الشُهداء
الراحو
الواحد واحد
ماك غلطان
غلطان الحِزب
الجمّ سلاحو
وخيلو ناهد
غلطان زمنك
وأصلاً وطنك
ياها جراحو
وعندك شاهد
رفضك سجنك
شان الكادح
والمُتكادح
يلقى سراحو
ويبرى الساعد
لامِن تقضِف دم
وشارعك هادي
يهز أصفاحو
وبرضو تجاهد
لامن صقّر
سِن منقارك
لامن طايرك
قصُّو جناحو
وخرَّ يكابد
ما حسّابك
إلا عذابك
وليلاً دايماً
كارمو صباحك
ونجمك ساهي
ولمّا بديت تفرِز
في عيشتك
لاكو عويشتك
وأجمعو جملة
بأنك تالِف
وإنو سقطت
مع إنك واقف
فوق أسمنت
وتحتك عُملة
وهم ساقطين
في البرد الناشف
وجاهم زاحف
قوز الرملة
الإملاق
العيش الشاظِف
وفي ظلامات
الزمن العاصِف
قاسي عبور اليم
يا نملة
وهسّي غلابة الدنيا
الكنت بتتعب
عشان إرتاحو
المنَّك راحو
وكجّنو حِنَّك
وعنك أشاحو
ضُراعُن غالي
عليك إتجارو
بدون ما تنادي
وصارو نفيرك
وقتِ حصادك
وراب نصيبك
وهرِّب هرِّب
خير بلادك
وسيبك
يا عويشة البلد القطت
ما يسقيك الدم الفاسد
ويا أودية الولد الشطّت
ما بيشفيك اليم الراكض
إلا الدم البدأ إلقط
واحِد ... واحِد
إلا اليم أب دماً نقّط
جاييك قاصد
ويا محبوبة في وضع خريف
شالِع دَجَلُو
وكِضباً راعد
بيت راكوبة
وحوشو صريف
سوّس مِرقو
وسقفو يناهد
أحسن تحت المطرة نقيف
بي كفيك
وكفِّي
والساعد
وراسنا نضاري
الطفل الواعد
لامن يبقى سمانا نضيف
من تخويف
تسويف
ومن زيف
ونلقى الوطن
الحِن مضطارد
ولا الموت
الدُغري الواحد
الوطن .. الموت ... الوطن
الوطن .. الموت ... الوطن
............
.........
..........






avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الخميس ديسمبر 03, 2009 8:20 pm

نادوس

محمد الحسن حسن سالم (حميد)

(تعالي .. فإن الأيادي التي في كتفها صقرُ قتلننا ثم لم يحيينا قتلانا)
الحال وراك كيفن تسر ..
باقيلك إنتي بلاك في زين
ما تهشم إبريق الرضا .. خنست نسيمات السمح
والبسمة زي حبة قمح
لفحا وطفر طيراً كُترْ
أورث عصافيرها الضنى ..
يبّسْ غُناها مع الفجر
هطل على الشدر الهموم .. وشاشات نهارات الهنا
عانيت وراكي جنس عنا
بوغ سهادي كرو النجوم
خطو المواويل إرتعش
حرّسْ عصاتي بنات نعش
دومست فوق حِجر البتول
هلوست بي صلب المسيح
دروشْ .. شردت من الضريح
شويمت بي ظلم الحسين
أومت علي كم ميضنة
وما بين عيونك والمغول
وما بين عيونك والوصول
ساهد بي قافلة الحروف
ووقف طنابير الزمن
إنضرضر إيقاع الفصول
هربت غمامة ورا الجبل
طرحت من النيل الجروف
شهقت شعاب إنساني خوف
منك عليك .. على أي زول
توك نياق شوقو الضنا ..
سرّحْ عصا التسيار قبل
درب الحياة المرمول فنا
يا وقعة الواقفين هناك .. يا وقفة الواقعين هنا
يا آفة الوطن الجريح .. إشمعنى لا وصلك دنا
ولا آفة الزمن المشيح .. قدرت رويحتي تيقنا
من جيتك المرقت بتين .. الدهدهك روحت وين
يا زين مرقتي مشيتي وين
غربل عليك ليل المدائن الكان زمانك حالا زين .. ناشدتها
فتش نهارات القرى المتكية فوق شعب الصبر .. ساندتها
علم بطانا الشيطنة
غنيت معاهن .. سودنا .. يا سودنا .. يا سودنا
لملمتهن والدنيا ليل .. والقمرة بت فاتا القطر
وصف لهم حس شليل .. ردد حروفهم ردتها
وقف سحابي مع الدغش .. شهدتها
شهدت معايا على العذاب .. الهد أضلاع الغبش .. راعفتها
تكلت خدودا على بكاي .. لاقي السجون .. جاهد بها
بي جيهة الجذب القديم .. دخلت مكندكة بالشباب .. خنت التراب .. راودتها
وفوق ها التراب .. واعدتها
ولا إنتي جيتي ولا هي آه .. روحت وين
يا زين مرقت مشيتي وين
كل البنات جو من الملي
هشن بكن .. شدن حكن .. وأزيارنا والمرحات خلي
يا إنتي يا مرت العدل .. ماك في صعيداً تترجي
روحت وين .. قوليلنا بس كيفن من الغلبان تجي
لو فينا أطلعي مننا .. أو برة أدخلي .. أدخلي
غنيتك البارح براي .. إنصلبتو التانيين غناي
والليلة بتواتاك شعر .. دونو إنعتاقك أو فناي
هيا يا مغنين الشعر .. ضد ها الزمان وطبنجتو
شعر ..شعر .. الشعر .. شعر أيوة يلا علينا جاي
ونكر المغني كمنجتو
نادوسُ يا فجر القصائد إندلقْ
ما حكّ جلدك مثل ظفرك فانطلقْ
إنا شرحنا لك صدرك .. أو شرخنا فانعتقْ
يا أنتَ يا كل الذين لأجل خاطرهم طهوتُ غداة عقم زهور كلم لتنفتقْ
غضباً يؤرق موقديه .. كورته ..
رجماً لكلِ من تنازل أو تخاذل
أو تشاعر
أو تداعر
أو تهاون
أو تخاون
أو تعاون ضد فتحك أو أتاني يسترقْ
تربت يداك ..
تبت يدا كل الذين تغامزو
وتهامزو ..
وتلامزو ..
وتقززو ..
فتلذذو .. من فيه جرحك يا وطن
نادوس آه .. نادوس يا ...
أمسينا يا نادوس واصبحنا بيك يا أمْ
يا سوسة ضد السوس .. قلباً بلاكي يضُمْ
ليل الضياع مهووس .. يحلم هواك يؤمْ
بعد الحصاد الروس .. عالم نداهو يعمْ
ختيت هواك فانوس .. بقالي شلتو وحمْ
جيت المدن باخوس .. لاقيتو جالب السمْ
راشح هجير البوس .. وكل الوجوه دم دم
كل الخلوق دم دمْ
كوركت يا نادوس .. أم الغبش يا أمْ
يا نخل يا أبنوس .. يا سامبا .. يا تم تمْ
يا البيك غناي محروس .. دخري الغلابة هلمْ
دهمني كم مجروس .. عكمت تاني وقمْ

حمرت في السحب المكبرتة ..
يا دخان يا ريحة يا خواضة للبحر المخنس
والعساكر والملس .. ما تختشي
بيوضة يا ماخدة الخريف .. ما طمبرت عربانا شي
مستني في الزمن النزيف .. القال بجي وفات بي وشي
رشت النهار بالصبر .. أبت المغارب تترشي
مشت النهارات بالصبر .. أبت المغارب تتمشي
دقست سواقي المتعبين .. كايسالا فيها عقاب عَشي
بيوضة آه .. أواه لو الكلمات حصى
قالت لي الله اقرب فرج
أواه لو الكلمات لهب .. نرجم به وش زمن القسا
قالت لي في إطن الليل وهج .. هدام أمان الناس نسى
دنقرت للأرض المسربلة بالسراب .. فردت بي غلبي العوج
فقدت أيادي العصا ..
شديت حزامات الجلد هرولت تاني ضرا الواطة
كوركت صد .. صد .. صد .. أرجع يا ولد ..
طورية أبوك تراها دي ... عاند كواريكك مشيت .. طورية أبويا تراها ديك
لفحوها لمن قام يصلي .. خطاب بكارات الغمام .. مغرب صباح ليلة دخلتو على البلد
حرق عروقي .. الفي الكلام عطشان سقيت عرق الشديرة من المطيرة الفيّ كان حس العساكر لا ورا .. قالت لي اجر ..
شدرة غنايا
جريك ضرايا .. جريك ضرايا
جريك ضرا قبل العساكر ما تصل قبل الدرادر ما تبين ..
وكانو العساكر في وشي .. قت أقول وقع ..
طينة الجداول ماها زي طينة جسارتك يا بلد والكل طين
يا نبوت .. دقة تفوت .. ولا حلم يموت
النندق .. نندق .. نندق ..
ويفضل باقي لهيب الحق
حق الناس ينزل في الحلق
أو ينعارض شوكة حوت
يا كهنوت اليجي كابروت
يا جبروت اليجي كابروت
يا كابروت .. كابروت .. كابروت

كابروت عشم وطن الغلابا .. الحال بلاك تب ما تسر
ما بان صباح أو عسعست قدامنا ليلة تزيدنا ضر
أوتارنا يا آخر الغنا .. حردان عشياتا النغم
فرغت مجالسنا البلاك .. عنكب على أبوابا السأم

أنزح .. كفانا كضب رياح وبكاء رعود وضحك برق
العشب مالي حشا الأراضي .. حواهو لما العش حرق
الشعب حي .. بس كيف تصد .. يملابك المليون عرق
كدبنا في الثرى في رجاك .. مافينا زولاً ما عرق
كدبنا في الثرى في رجاك .. ساوين عصا الأشواق مرق
عربان ونوبة نهاتي بيك .. والزنج تتمناك عتق
ورا يا وجع .. هيا يا طلق .. طلق .. طلق
صد لي ملامحك يا حراز .. ريح العوارض غربت
فرتق ضفايرك في الرذاذ .. جية العصافير قربت
لاقيتا في غابة مديني .. وسط شتيلةً حبحبت
على عش صغارا الدوب حبت
ما وقف الليل لا الهجير .. كم جفّ ريقا وورتبت
لاقت من العنت الكتير .. ملت الفيافي .. أحدٌ أحدْ
فايدة جناحي بلا أطير .. الموت ولا العيشي النكد
بالصرخة .. يا نيل مدد ..
يا غيث مدد .. مدد .. مدد

ندى دمر نادوس ونشوغا ...
وخلي الناس الصبحت يوم من حيات الخور ملدوغة
خلى الصوت الكبتو الجوع يلقى براحو .. يضوع ويضوع
الصوت العالي .. يا صوت الناس التحت الواطي الما مسموع

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الجمعة ديسمبر 04, 2009 7:25 pm

جية الشليل


شوك الشوق .. لي الشوف آ خي
ضارب في إطن النسج الحي
يا منقاش أحزان وإنشرت .. وادي الفرح إتمدد صي
يا راحلين عِنْ دُغُش الليل .. ما لاقيتو جناياً زي
تكية نخل الفجر الجاسر .. في المترة عراجين ضي
يا رعّاوة العرب الرُّحّل .. ما لاقاكم في المطراني
في كاويق الجرف الأمحل
بين أسراب الرهو الراحل .. ساند أكتاف الليل الميّلْ
عِنْ ساساق الغيمة عليكم
بين رقراق الخيمة معاكم .. ما أديتوهو شوي بي حرجل
آ رطانة الليلهم ليّلْ
ما لاقاكم في ونساتكم
بين الشادي وبين كاساتكم
في صلواتكم .. عِنْ دعواتكم
أو دقساتكم عِزْ خلواتكم
زول زول الله إن ِمحِن آ بسأل
الهبّاد لي غُلْب اخواتو
الفرّاح عوّان الحلِّي
الفدّار لي الليل ظلماتو
آ نجمات شقيش قولِنلِّي
ما لاقاك طالع مندلي
المطعوم من طيبة أماتو
الفجاج الندّ نباتو
موج البحر الأحمر هوجتو
وعرق العرق اللاوي ثباتو
جانا الشدر الأخضر منو
ونار الشدر الأخضر جاتو
راح شقيش أب قولاً واحد
ليش ما يرجع من غرباتو
طول طول ما طلّ علينا
وقاطع مننا جواباتو
الغابات جات تنشد منو
العربان راجين جيّاتو
أديناهم علقو وعَرَقُو
وصورتو يقلِّب في كتباتو
ضل رشاشو .. ركيزة زولو
ساعات سلمو ويوم حوباتو
سن طوريتو .. ولون أبرولو
وحس طمبورو البي نغماتو
لهلب عشق الناس الفقرا
وبرّد جوفِن .. يا غنواتو
الدخلت فينا .. تمرق جينا على جلاتو
وجيداً جينا .. طلقنا وشينا .. ووش أطفالنا الليلة حلاتو
غني معانا غنانا هويتو
غني العالم غني حياتو
لا ساومنا عليها قضيتو
ولا فكينا من إيدنا وصاتو
ألف شليل يا نورة يفوتو
شان ما يجيكي شليلك ذاتو

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الجمعة ديسمبر 04, 2009 7:29 pm

النخلة


النخلة في الليل المهول .. وحيدا في عز الرياح
فارس يدارق في الرماح .. الجايا من كل إتجاه
رغم الجراح .. شح إلمي .. الزاد والسلاح
راكز يصول .. لا أنّ ولا حنى للجباه
لا خان بصيرتو الإنتباه
لا حتى قال ديل المغول
لا ختّ آه على عز قديم .. روح عجول
طول مداميك الصبر .. سدابا طاقات النباح
كل ما نزف من جوفو دم .. كل ما عزف لحنو الصباح
نجم الميامين الحمش ..
ينضارى شان تشرق شمش
تدي الحياة .. الناس .. الحقول .. الدابة .. والطير .. والبمش
لكنو ما بخبر أفول .. والأرض مخلاية التعب
مصلاية العشق الصعب .. ما بتستباح
زي نخلة .. في الليل المهول
كانت بتختبر الفصول
كانت بتمتحن الرياح .. كل ما تطول
والدنيا خوف عابر سبيل ..
يشوف عنف الرياح في النخلة .. واللا النخلة في عنف الرياح
في ليل مهول
طوالي راح يحلف يقول .. النخلة ما بترجى الصباح
والطيب الصابر سنين .. راجيها باكر .. حقو راح
لا فكّ دين ..
لا سدّ جوف .. رزقو المعلق في الصبيط .. مشهادو أصبح بين بين
النخلة ما بترجى الصباح .. لكن ضراعاً في البلد عارف عروق النخلة وين
خابر صمودا المن متين .. وسامع مناتقة الرياح ساكت صياح
لكن ضراعاً في البلد عارف عروق النخلة وين
ضامن ثبات ساقا الهطيط
وسامع مناتقة الرياح ساكت صياح
النخلة ما بتقدر تخون الأرض .. ما بتقدر تكون غير المراح
لي همبريب يغشى البيوت .. عند الصباح
نص النهار .. عند المغيب .. عز الرياح
النخلة تتجاسر تصون عش الطيور البينا .. تفرد للجناح
ما ليها غير تطرح تمور .. تملا الشواويل القفاف
ينتمّ زين .. ينحلّ دين .. يطلق ضهر زولاً بسيط ..
واقف على حد الكفاف
ومن ركة الرزق المتاح .. رزقو المعلق في الصبيط ..
ينزل كما الطير الخفاف .. يقدل نشيط ..
يخضرّ زي شتل الضفاف .. كل ما النشاف بدا في الصبيط
والنخلة لو عنف الرياح .. الصاعقة ..
أهوال الفصول .. آفة الذبول .. قدرت على ساقا الهطيط
تقع آ بتموت
تلقاها خشت في البيوت .. بي كل صراح
تبروقة .. سجاجة طهورة .. طبق من العرجون ..
ضنيب هبابة .. قفة وكسكسيكة .. حبل متين فتلوهو في ضل الدليب ..
نشلوبو من بير للشراب .. نسجوبو بنبر وعنقريب
تلقاها خشت في البيوت .. وبي كل صراح
جوبيل جريد يعرش سقف بيتاً جديد
أول دخلتو عريس سعيد
مبسوط يقرقر بانشراح
أو حتى واقوداً تقيدو السمحة في نار بارتياح
لي يوم عزيز ..
يطلع خبيز
نبيذ الليل صفاح
يطلع ملاح .. بروبو ناساتاً ضيوف
ولي زول وراهو شغل بعيد .. جابرا الظروف
يطلع قهيوتو وشاي صباح
وآخر المطاف ..
الموت بيلفح بسمة من توب الزفاف
الموت بيشرق نسمة في كل الصبا
النخلة ترباية العباد .. بي جلالا تنحول رماد
ورمادا ينحول سماد
وسمادا يدخل كم بلاد
وديانا تخضر والبطاح
شوف كيف كفاح النخلة .. شوف كيفن بتتحدى الرياح
تعبر على مر الحياة وتنمطق الموت بي جلد
من بعدما ملت البلد .. شتلاً معمر بالألوف
وشايل مخلف بارتياح
طول المصير .. النخلة حوتة الصحرا .. نوارة الجروف
تلقاها في أجمل وشاح
بي جراحا رجّتنا الصباح .. يا القلتو ما بترجى الصباح
النخلة تحت الأرض سر .. والنخلة فوق نخلة نصاح
والدنيا أوسع ما تكون .. والجو براح
وكل الرياح فوقا بتمر .. يكفيها دا .. ويكفيها صاح
ما استسلمت لي ريح غريب .. وكل الرياح فوقا بتمر ..
والنخلة ما بتخبر خلاف ريح اللقاح
والهمبريب وريح الصلاح
يا معوض الليل بالصباح
يا معود النار اللهيب .. روض نخلنا على الرياح
وفي لجة البحر الغريب .. أدي الرواويس الصلاح
يكفينا دا .. ويكفيها صاح

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الجمعة ديسمبر 04, 2009 7:32 pm


بين الموجة والخزان
حِلم إنسان

هردَت لِهاتى
وقُت يبرُد حشاك
يا أمي
ومن التعب البلا صالح
تفيقي
تروقي
تنجمي
تسوي مكانسِك
المطرة
تضوي البيت
وتنحمي
تمُرقى صبوحة
للجيران
قدح فوق إيد
وفي إيد ألمي
يلاقوك شُفع الكُتاب
نُضاف
وظُراف
بلا النسَمي
ويغنولك
غناوي السَاب
وفي بيَُوضة
مافي سراب
جُبال كجبي
وفيافي الكاب
تميد بالخُضرة
مُنقسمي
ولا آبار
ولاهو سِحاب
وتِنهجمي
من الدهَشة
وتحاحيهُن
غُناكُن ني
غُناكُن ني
غُنا الوهمي
ويهتفوا زي
كِلاب الحي
على الأغراب
حوافي الصّي
وبيوضة
البراسيم فيها
مفروضة
خدارا يراري
شوف عيني
على الأبواب
قماريها
وحواريها
وطواريها
بِقت روضة
بِقت تشرب
من الحامداب
تشربي عافي
من إيدي
تدوّي أيُيُيُويا
بي حِشمي
تسوي السّي
وتبتسمي
........
.............
تشوفي رِهاب
بُعُد نجمي
وأشوفو قريب
قُرُب نضمِي
أشوف العالم التِحتاني
هيلا هُوب
وقف ناهِض
ودكّ عمايد
الفوقاني
جوه الجُّب
رمى العارِض
وفي السابُو
الدمار أفراق
عِريق الحب
نبض قابض
مِتِل قبض
الحروف
في إسمي
غناوينا القبيل
رقراق
علينا تصُب
برِد قارِص
ألُك طِيناتا
من دمَي
وأرمُله
من عصب عُشَاق
أنُط تُلَُب
وأجيك
عارِض
وأجُر
نمي
أدودي لِهاتي
بالغنوات
عُقُب
يبرُد حشاك
يا أمَي
تسوي السي
وتبتسمي
تسمَِي اللـه
وتعتصمي
بحبل القُدرة
تتفرَق
ظُلُمةً
فيها نِتحرَق
صُرُمةً
قالوا ليك
قِسمي
أدودي لِهاتي
بالغنوات
عُقُب
يبرد حشاك
يا أمي
تقِلبي اللكمي
بالكِلمي
ضُراعِك يرمِي
ما يدمِي
تقيفي
بعيد عن الشَُمات
تكوني أقرب لي
من إسمي
وأضُمِك بإرتياح
يا أمَي
أحبك صاح
وصاح حِلمِي
ولاكي سعية للضبَاح
ولا شمش الصباح
حِزمِي
ولا كتف السِلاح
سوَاح
ولانزف الجراح
ألمي
هيا إنحزمي
هيا إنخلقي
هيا إنعتقي
متين مو دايري
ري تسقي
لا في إيد النزيف
نبقى
ولا في إيد الخريف
تبقي
ولا الفيضان يبضَِع بك
ولا في القيفة
تنهدمي
ولا إن جات حارَه
تِنهزمي
ولا يغشى الغُلُب
قلبك
ولا تشقِي
ولا إنتي تخافي
لا تدمي
ضُراعِك يرمِي
ما يدمِي
فيا حُزن البلد
عوووك .. كر
ويا سعد الولد
ضر
ضر
مع النسمي
وألِو
قيمة العمل
عِمَِي
وأفتحي ظُلمتِك
للضَي
سِني على النِضال
إيدي
سوَكي بالهُتاف
فمَي
شوارعِك لي
دويها عليَ
إذا ما آخر العِلاج الكي
مراويدك حُمُر
صمَي
مراويدك حُمُر
يا أمي
بليلتي
ولا ضبايح طي
قليلتي
ولا كُتُر سِمي
وطني ولا ملي بطني
سُكاتي ولا الكلام الني
سلام يا أمَي
سلام يا أمَي
سلام لا هكمي لا دكمي
............
.............
.......................
avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الجمعة ديسمبر 04, 2009 7:35 pm

أملأ قلبك



أملأ قلبك بالوطن ... بالصُّغارْ
قومة العمال دَغَش ... بالنّضارْ
المزارعية الغُبُش .. بالجنود الوين تخش في سبيلك كالنهارْ
بالمداد الما بيغُش .. بي وتر جاء من الجحيمْ
أملأ قلبك بالنسيمْ
ملِّي بالطير الرطنْ
طيبة والعالم قديم ... ينسى كالريح ... المحنْ
خلِّي بالَك مستقيم دغري وإن مال الزمنْ
راحل الليل البهيم والبصيرات ما عِمَنْ
الظروف الليلي أبن ... طيبة لا خوف لا حزنْ
باكر التِّقْيات تنورق وتنملي الضرعات لبنْ
طيبة يا صمت الحنين كلما طفاهو همْ
لا في آهة ولا أنين لا بيروع ليح ودمْ
من مرارات السنين من عصارات الألْم
بيمرق الشوق الدفين بي كعنكيل العشمْ
احكي ليك يا طيبة حكوة
ذات زمان من ضيق وقسوة
وكل يوم من بارحو اسوأ
والمراحات قاطي قطْ
فجأة في قلب السماء ... غيمة غيمتين .. غيم ربطْ
كتمة حتى الطين عِرِقْ
والشجر قرب يَبِقْ
إلا يا طيبة الخَلِقْ ... من بدل تفرح تَنِقْ
الشِّكايات ... السخط .. لا السُّحب دارت تَصُبْ
لا الهبوب داير تَهُبْ
نسمة نسمة آ رب هبوبكْ
من شمالك من جنوبكْ
الهبوب يا رب هبوبكْ
من شروقك من غروبكْ
من تحت من فوق هبوبكْ
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خش آ حول في حول ...
ظاهر الحال ماهو مخفي ....... وقولنا فيك ما فيهو قول
نسمة كل راس ساعة تكفي ....... نسمة واحدة لألف زول
ينطلي الجو بالَحمَارْ
فجأة من حر لي غبارْ
الطشاشات الدّوارْ
السبابات النِّقارْ
نقة الضيق تنطلقْ
قلنا فاقت باتت أزحمْ ...
الغبار من كتمة أرحمْ ...
أرحم الحر البيلحم ... لا ده لا ده ولا فرق
طيبة تمي الحكوة قولي
الصّبرُ خلقوهو هولي
الزمن يقسى ويَرِقْ .. وانتي يا كتمات تطولي
اليطول بال الخلق .. طَرِّقْ الغنوات يا زولي
عدّ فات الريح شَرِقْ من بعد ما جاب سحاب
من بعد قشّ التراب ... مشط القش والشجر
رجّع الطير للوكرْ
ها البرق شال البرق .. الرعد ريحة الدعاش
ابشروا بالخير نقطت أي والله المطر

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الجمعة ديسمبر 04, 2009 7:37 pm

s

مناقيش العدالة

مني متعشم طلوعك ..
كلي مستنيك تعودي .. ويغسل الساحات رجوعك
في حشى أحراش الليالي منتظر بقة شموعك
تشتلي الضو في الضهابة .. ترخي للجايعين ضروعك
يرجع الطير المهاجر .. يملأ في الفجاج ربوعك
.......................
في كلام الناس بفتش .. بين عوينات المدارس
في صدى آذان المساجد .. ورنة أجراس الكنائس
في إندهاشات العذارى .. في إرتعاشات الموامس
في بحر فرحان يبشر .. موجو لي جية النوارس
الرواويس طمبروك .. وهز بيك في الدارة فارس
.........................
بين سكات القرية أفتش .. بين هضاريب المدائن
يا نسيماتاً تكربت .. شايلة أشواق الجنائن
لي جديول حلقو ناشف .. أو عَرَق تربال يكادن
في وشي الأفراح بفتش .. بين قفا اللحظات أعاين
بين سواقير الفقارى .. الجاية من تالا المدافن
مرة طال الليل عليّ .. ووصلت الآهات مداها
قلت لي النجمات مو جايي .. قالت الأيام تراها
يا ضيا القمرا القبالي .. شوكة الظلم الخيالي
عسمت فوقنا الليالي .. خبي في إسراعك تعالي
يا مناقش العدالة
بتنا فوق الصبر عالة
يا تعاويذنا وعزانا ..
خلي نور الفرحة يطفر من عوينات الحزانى
صخرة الأحزان تقيلة .. ونحنا ما بنملك سوانا
قولي هيلا هوب معانا .. من على الشارع نشيلا
سكة العمر الطويلة .. ترتى في الجايين ورانا
صرنا زي رحالة عنك .. فتش الكون تبني لبني
وراح سأل طيانة تبني .. وقالوا جاية
بالعوينات البقومن بدري شايلات القراية
في تلوت الليل تبوغ .. سارقة للدنيا السقاية
ولما تورد .. بنسلينا الجردقة .. القرض .. المحاية
جاية من ضهر المسافة .. البين بناء الطين والسرايا
طالما في الدنيا ناساً .. فاتو للجايين فداية
وناس على جلاتا تكتب بالثبات .. والنيل دواية
جاية .. جاية
دفة التاريخ في إيدا ..
دم عروق أماً بتنده راجية نص الليل وحيدا
بيتت في القلة مويتو .. وزادو في المعلاق عصيدة
جاها في جواب يسلم .. للبلد داني وبعيدا
يمة يا نفس الوصية .. الكل ما شرقت نعيدا
يانا يا شخب القضية .. الصافي في قدح القصيدة
مانا قنعانين تملي ..
من دواية الصبر نكتب فينا والإصرار يملي
تنعدم موية وضونا .. بيها نتيمم نصلي
الزمن ينقض وضونا .. تاني نتوضأ ونصلي
ونمشي فوق دربك نباصر ..
في الرمال والشوك نحاصر
بي شعاع بكرة المسافة .. سطوة الليل والعساكر
تنهزم ريح العوارض .. والمواريث التعوقك
ومن شقايا الحال تبقي .. وتقدح التاريخ بروقك
وكلما مرقت غبينة .. تمشي لي داخل عروقك

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الجمعة ديسمبر 04, 2009 7:42 pm

الجابرية


كان ضحوية ... وكنّا نسنّد في المحروت
فجأة يدوي مكبر صوت
قال الريس مار بي فوقنا
من شغلتنا قلعنا عروقنا
إن شغلتنا بلا ماروقنا
فكّينالو حبل واسوقنا
وإنماسكنا يطمّن روقنا
قمنا جميع الحلة مرقنا .. البيشوفنا يقول وا شوقنا
كان ضحوية .. وكانت عين شمش الله قوية
وكان الريس في عربية .. واقف طولو تحت شمشية
هللنالو وهلجنالو .. ولوحنالن بالطورية
فرّ عبايتو وهزّ عصايتو .. وهزّو بنادقن الضابطية
صفقنالن صفقة قوية
زغردنالن .. وهّدن عندنا خمسة دقائق
قدمنالو كتاب الله درقة وسيف .. تبروقة هدية
قفة تمودة .. وفاس دهبية
وكنا قبل بيّتنا النية
وبين بنتين علّينا اليافطة .. اليافطة ام زيق الدمورية
وانعبينا هتافاً واحد :
( الجابرية تحي الثورة ..
دايرين بوسطة ومدرسة وسطى
والشفخانة وسوق منضبطة )
روح باسم .. قام خاطبنا بنهج الثورة الصارم وحازم
أمّن لازم من شفخانة والتعمير بالعون الذاتي
أمّن لازم من شفخانة ومدرسة وسطى
والتعمير بالعون الذاتي .. إلا البوسطة دي ينظر فيها
اما السوق .. السوق منضبطة
وبالتأكيد .. للتجار الأسعار واضحة
للمستهلك باينة وواضحة .. وإن جاملتوهن تبقى الغلطة
إنكيفنا .. رفعنا إيدينا وهزيناهن بالتأييد :
( لا تفريط في قوت الشعب ..
سحقاً سحقاً للرجعية
الجابرية ضراع الثورة ..
بالإنتاج حا نبني بلدنا )
وكانوا في جيهة ونحنا في جيهة
هُن إنهببو بالكابات .. وما همانا الصيف وعرقنا
فات الريس وانفرتقنا
انفرقنا على الجابرية .. كلنا ننضم وما صدقنا
بالجابرية تجيها البوسطة
الشفخانة ومدرسة وسطى
قلنا يا ريت لو زارنا فطور
وانحزمنا ضبحنا التور
كنا اقلاّ ضمنّا النور
أو ياريت لو زدنا الصفقة وعاش .. ويسقط ويوية اليوية
كنا أقلاّ ضمنا الموية
كنا بننضم بي إيدينا .. ( ده أحسن ريس مرّ علينا )
من الله خلقنا وشُفنا خلقنا .. ده أول ريس ذاتو يجينا
وكونه يجينا يقنّب بيننا .. يشوف البينا .. كفاية علينا
آ الجابرية يجوكي الحكماء
آ الجابرية تواصلي البرة
آ الجابرية ولادك تقرا
نمشي الليلة نصاقر الرادي
نمشي الليلي نحضر النشرة
كنا نرجع في كلماتو
إلا في ستة من الجابرية .. قالوا تعبكم خارم بارم
يذهب حاكم خلف الحاكم
والجابرية تظل في حالا .. حلة حياتها تسر الظالم
صدفة تموِّت وتحيا اطفالا
لا جلكوز لا تقرا رسالة .. لا راح يطلع منها عالم
ما بينصفكن إلاّ ضراعكن .. عبّو ضراعكم يا رجّالة
وخلو بصركن دغري وسالم
حكم العسكر ما بينشكّر
كلّه درادر .. كلّو مظالم
ما هو قدركن تحيو همالة
مقصودين والقاصد فاهم
وقاطعناهن .. حاربناهن
تمّيناها البينا شتائم
حالَتُن احسن ناس في الحلة
إيدا نزيهة .. عقولا نبيهة
وقلنا يفرزوا وقلنا فواهم
يطلعوا فالصو وقطاع رحمة
عينة شماتة وخارم بارم
وإحنا القصّر واثقين فيها
وقطعناها معاهم جملة وقاطعناهن
وصاروا في جيهة ونحنا في جيهة
مرّ اليوم .. الشهر .. الحول .. والجابرية بلد في حالا
قواسي شيوخا .. مآسي أطفالا
عذابات ناسا .. حلة تعافر ومقطوع راسا
من القُرّاصة ولي قَرّاصا .. حلة تعافر ومقطوع راسا
عشرين كيلو من الجابرية .. صبية تساسق بي كرّاسا
آ الجابرية عذابك فينا .. لاكي القرية ولا كي مدينة
وفد في وفد يقوم ويجينا
عايزة دراسة واجراءات
عون امريكي قرض ألماني وحاحاءات
وحد ما نشوفلنا مسعولين .. مسعولين أو خواجات
نجري نلم قدحاتنا عليها .. ترطن ترجع زي ما جات
الشفخانة وعايزة دراسة .. ومدرسة وسطى وإجراءات
لما المطوحة طالت بينا .. إنذكرنا العون الذاتي
إنحزمنا وقلنا برانا .. نبني نقوم لي الشفخانة
طوبة في طوبة .. وقومناها
ويوما التمت جات السلطة عربي وعجمي ومرة رطانة
الشفخانة ده ما هو بُكانا
هاك يا تلتلة هاك يا ورطة
وغصباً عنك يا الجابرية .. غصباً عنك يا أحوالا
وحمياتا وموت أطفالا
وحمرة عينكن يا رجالة
قوة إنشكت بيننا النقطة
وفي الجابرية تحوم الشرطة
هووا كلاب الحلة وصنّوا
ومن يوم داك ما شفنا الستة
وفد الحلة السافر جانا .. قال إنأكد شاف الخرطة
ونحن بدل نبني الشفخانة .. إنسرعنا بنينا النقطة
الشفخانة ده ماهو بُكانا .. وكانت غلطة إنقلبت ورطة
إنفاهمتو مع المسعول ؟؟؟ إنفاهمنا مع المسعول
وقال حا يقوِّم للشفخانة ؟؟؟ أو يدفع لنا حق الطين
مع إنو النقطة وكت بُنيانا قومتوها بلا زنزانة
في تقديرنا كلام معقول .. كون يقوِّم لي الشفخانة
حاجة تضحك .. محرقة ... هانة
انتو تقيفو مع المسعول
واللا الكنتو تقيفوا معانا
وقلنا وخفنا نصد الجاي .. خفنا نفشل باقي الخطة
فضلت جايي .. هي فضلت خطة
وانفرقنا على الجابرية .. وانعلقنا تجينا البوسطة
ومدرسة وسطى والشفخانة قصاد النقطة
تجينا .. تجينا .. تجينا ... تجينا
وما إنيقنّا ..
ناس إنولدوا وواحدين ماتو
لمّا الريس ودوشتو فاتو
فاتو العسكر .. وجو الأحزاب
ونفس الحلم إنجدد تاني
نفس الوجع الراح تحتاني
حتّلناهو جمعنا رفاتو
نفس اليافطة في نفس الحتة :
( الجابرية تحيي الشعب
دايرين بوسطة ومدرسة وسطى
والشفخانة بديل النقطة )
فينا إنكلم شيخ الحلة
صنقع .. دنقر .. سلم وصلّى
وكانوا كلاب الحلة بهووا
وقال كلمتنا تكون فد واحدي .. شان ننقوى ما ننزلا
شان مشهادنا وعدل الحلة .. نحن نفوِّز حاج البلة
وزاد هوهيو كلُّوب الحلة
وبعضنا عارض .. ردّ وفاوض
شيخ الحلة القام حمسنا .. بلة الحمش الزول ما دلة
أول فاهم وقبلوا ولدنا .. وراح يحكملنا بي شرع الله
هو .. هو .. هووا كلابنا .. لمّا استغرب شيخ الحلة
وانفرقنا على الجابرية
انفرقنا ويوم الليلة إنجمعنا عموم الحلة
شيخ الحلة قرا القرآن .. صنّوا كلاب الحلة وهووا
وبلة إنقدم سمّ وصلّى .. صنّوا شوية .. وهو هو هووا
وقام إنكلم .. وعند إنكلم كان بينقسم
النسوان الجاي تنهامز
الصبيان الجاي تنغامز
وكان بينبسّم
وكانو كلاب الحلة بهووا
شكّر وشتّم .. هو هو هووا
حلّل وحرّم .. هو هو هووا
هود سابنا .. وفات ودانا الآخرة وجابنا
قاطعناهو وصوتو إنوطّا
اصلاً واطي وتاني إنوطّا
دايرين بوسطة ومدرسة وسطى .. والشفخانة بديل النقطة
التموين وزيادة الحصة .. كهربا موية وسوق منضبطة
بلة انبرع وقال ببنيهن .. هو هو هووا كلابنا واستغربنا قبل بالمرة
لامن نهتف ترسى كلابنا .. لامن ينضم بلة يهووا
بلة انحمس وقال بسقينا .. وبي إذن الله يضوّى الحلة
هتف الشيخ وهتفنا وراهو :
لا تبديل لشرع الله .. هو هو هو
ولا ولاء لغير الله .. طاء طاء طاء
عاش الفارس امل الحلة .. بلة الطاهر علي حسب الله
بلة الطاهر علي حسب الله
كبر فينا وقام إندلّى
ولسة كلاب الحلة بهووا .. وزاد هوهيون
كبشاً ضاع .. من مرحاتو وفاقع باع
بلة الطاهر على بلاّع
كانت أول مرة نشوفو .. يومنا الشفنا اللاندكروزر
اللونا مخطط .. والبنوت الراسا مربط .. التنبوبر
لوري مكوش أقمشة .. سكر .. حتى الفوفو
وعتِّل تؤجر .. وامحى المنكر بي معروفو
بلة الطاهر علي بلاع .. اكرمناهو .. اكرمنا ضيوفو
يشبة مَرَتْ الشيخ في وشيو .. لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول برّانا نغير قولنا
إلا كبار الحلة بقولوا .. بلة ده هولنا .. بلة ده أصلاً من ها الحلة
إلا إنربّى وقرا في الخارج .. ورافق جدو الفتح التركي
وسيرتو انقطعت في المهدية
ومرة سمعنا استوطن برة .. وقام إنزوج من مصرية
جابت علي .. علي جاب الطاهر .. حتى الطاهر خلّف بلة
جدو اشيطن اخير ما لانا
وبلة انسركن جاء وبرانا
أقرب واحد لي حاج بلة .. أقرب واحد شيخ الحلة
بلة الطاهر علي حسب الله
أول مرة يصلي معانا .. قدمناهو وقام أمانا
صوتو مرخرخ لمن يقرا
يقرا ويقطع زي البطرا
لامن يركع جسمو متختخ
عند السجدة سجودو ممخمخ
شيخ الحلة يقول عن امرو
زول غرقان في الدين من عمرو
ستة سنين قابض في جمرو
ما فكاهو طريق الله .. صوتو وِدِرْ من كترة ذكرو
وجسمو التختخو شدة صبرو
قلنا حقيقة .. الزول بي عذرو
وفتنا قناعة .. ومانا قناعة
إلا الستة الصارو جماعة
قالوا ده زول ترباتو مياعة
ما بيشبهنا ورفعو وضاعة
زول زول دنيا ودنيا صياعة
قصة دينة ودقنو بضاعة
واحنا اصواتنا .. يا إما مضاعة
يا إما جهالة وناس متباعة
وفي الحالتين آمالنا مضاعة
وخارم بارم
كونها بوسطة ومدرسة وسطى ..
والشفخانة وموية نور
كونو يجينا ده ما منظور
وزيادة الحصة .. الزول زول سوق .. زول من جدو يلف ويدور
ويا الجابرية ده مطلب عادل كونو تطيبي تكاتبي وتقري
ضوك يشلع .. دشك يرشع .. واحنا دفعنا ضرائب بدري
ولسه بندفع .. لسع .. لسع
بس يا جماعة .. إن قضينا حياتنا تباعة .. وصنّيت رادي
وقول في الفاضي .. خوفنا نقوم ما نلقى أراضي
ونحنا أساسنا وراسنا زراعة
والجابرية إن دايرة شفاعة
ما بيشفع لها إلا ضراعا
عبو ضراعكن يا رجالة .. وخلو بصركم دغري وسالم
عبو ضراعكن يا رجالة
شيخ الحلة أضلّ وضلّ
واسألوا بُرّة وحاجة السُّرة
عن التيبان وحكاية الصُّرة
اللمّ البلة وشيخ الحلة مع شرع الله
والناس ديل العارضين برة
جرّبناهن كمين مرة
تاني نجرب شان ننضرّ
ويا الجابرية معاكي سلامة .. كان الفوقك ما فات مرة
كان كلماتن ناشف ريقا .. وكانت مرة
إلا حقيقة .. غلبنا نطيقا .. وين في الصرمة وقل القدرة
سكتناهن بس ما صنّوا .. وقاطعناهن تاني المرة
وبلة طريق الناس وخيارا
فوزناهو وجانا زيارة
كرمنالو التور وعرضنا .. وخليناهن برة الدارة
دايرين بوسطة ومدرسة وسطى
موية وكهربا والشفخانة .. زيادة الحصة وسوق منضبطة
وصدوا كلاب الحلة يهووا .. ينضم بلة يهووا معاهو
نهتف نحنا يزيد هوهيوا
مافي شهر جاتنا الخرسانة .. جان السيخ .. الطوب .. الرملة
جا الأسمنتى شكارة شكارة
عديناهن ألف شكارة
كرمنالن خيراً جانا
وكل كلاب الحلة الهوّن .. طفشنالن بالجبخانة
وفي صنانة تدودي الزانة
انغالطنا كتير في بعضنا .. أولى المدرسة ؟ واللا البوسطة
أولى المدرسة والشفخانة .. الشفخانة محل النقطة
ونان النقطة .. نحنا أهالي .. وودنا صافي
بينا معزة جرائم مافي
وما بنحتاج لي شرطة ونقطة
تحصل علة .. في شيخ الحلة وناس السلطة
نحنا الإيدنا بنت لي النقطة .. والجيرنا زبالة اطيانا
ناس السلطة إن دارو النقطة .. شي بُكان أرض الشفخانة
وما طالبانا خلاف زنزانة
مدرسة بوسطة
ستين طلبة وعشرين اوسطى .. شغالين ما ملو سخانة
مدرسة بوسطة .. وقلنا غُنانا
يا الجابرية .. الله أدانا
حاج البلة المبروك جانا
جاب المدرسة .. جاب البوسطة .. وبكرة يرجع للشفخانة
نصحى نصابح موية الدُّش .. نمسى نلاقي الضو عمانا
مدرسة بوسطة .. مدرسة بوسطة
وتاوق .. تاوق .. تاوق ..تاوق .. تخ
وفجأة تبين في السطح الخرطة .. وكب تنتصب الميضنة أخ
أخ من حظك يا الجابرية
سابع جامع بالجابرية
وصدوا كلاب الحلة يهووا .. أخ يا الناس الحالُن قطّ
هو .. هو .. هو .. هووووا
في البلدان الحظها فاجع
بق يا الصاح الماك متراجع
حرِّق دبش الدنيا الغلطة
بق وانفرق في الجابرية .. بق في ارحامنا في شافع نافع
ترفعوا امو في حيطة الجامع
يكتب يسقط دجل السلطة .. يسقط بلة وشيخنا التابع
وكشفناك وكشفنا الخطة ..
تحيا كلابك يا الجابرية .. يحيا ضراع الزيتُن طالع
غُلب يصارع مر الواقع
يحيا ترابك والطورية .. الجابرية تحيي الشارع
دايرين كهرباء دايرين موية .. دايرين سلطة وسوق منضبطة
دايرين هسة زيادة الحصة .. الشفخانة بديل النقطة
دايرين بوسطة ومدرسة وسطى .

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الجمعة ديسمبر 04, 2009 7:49 pm

اتبرا الطيبة


بينما نحن نقاسي بين رمضاء الماسي
و أقاصي المقبرة … فأجتنا اتبرا
فإذا بالمقبرة تتنامى سنبلات
و الماسي قبرة
دوزنوا لحن المبادي فالأيادي حنجرة
لونوا قوس الأماسي كيف كاسي محبرة
وطني … أو اتبرا
خلف ليلاي قصاصي أي فجراً يا ترى
وطني … أو اتبرا
اتبرا الطيبة يا منجم الثورات
كيفك بعد غيبة وغربة ووطئ جمرات
رجالتك الهيبة … نسوانك الحارات
قالن لي قولا تسر … تنفع زمان الضر
كل البلاد أم در .. والمهدي حي ما مات
الخطوة في الشارع منبثة ثورية
بق الغضب طالع .. أبرول وطورية
شافع ورا النافع .. طلبة وأفندية
الجوعو كان دافع .. لي هبة شعبية
ما الصبر ما نافع في أيام كركية
ذات وضع همباتي .. وأحوال متل دية
كهان وجهدية .. وكابات هي ما هيّ
حموني اغرودة والدنيا عيدية
حرموني زغرودة في فرحة عادية
حظروني من عودة .. أو مرقة ليلية
منعوني من ذاتي .. واخواني جندية
للقمع يوماتي سدوبا وردية
شك في هوياتي .. فتيش وسخرية
لكناتي .. لهجاتي .. شلخاتي .. عينيا
أوكير وحمداتي .. باعوضة سل فيا
تحتاج معاناتي لبطاقة شخصية !
يا مسخ بعاتي .. وقام لجنة شعبية
لي حضرة الآتي .. شايل الفرج ليا
عبيت مساماتي .. من غيمة منفية
وعلى أرض مأساتي .. فرغت ما فيا
وضل الوطن شاطيء .. وشمسو المراكبية
النيل ديمقراطي .. والقيفة جمعية
بردت غنواتي .. بي نمة مغلية
بقت هتافاتي .. دوديتا بي إيديا
في دقن همباتي .. وعسكر حرامية
طارت حماماتي .. وركت سلامية
غدروها شماتي .. وكتل الرصاص فيا
لكن يا مواتي .. يا ذمة مشرية
يا عسكراً فاتي .. مافيا وطفيلية
من شرفة الآتي .. وبي كل حنية
أخدني أماتي .. بي طرحة و أمنية
ربطن لي جرحاتي .. وبي مرتق واغنية
سدن لي آهاتي .. فوق وقفة صخرية
سنن لي إيديا .. وصاحن بي صد صارع
يا عيش وحرية .. وانغير الواقع
يا ميتة دغرية
نار التكل ماتت .. نار فينا شن حية
و روحك إذا فاتت .. روح الوطن جية
أماتي يا أمات .. كل الغلابة الجات
من حلفا لي نمولي .. من بارا لي سنكات
غضب الخلا اليغلي .. صرصيرة الغابات
في عب ضلوع النيل .. جيب القلب غيمات
أشواقا تالا الأرض .. والأرض شوقا نبات
أماتي يا أمات .. ود الحياة الصنديد
قولاً لكل عنيد .. وصاحب دقن همبات
قولنلو نحنا حديد .. زي المرمة شداد
اللي ضميمتو يخون .. ما أمنوهو بلاد
يا مستبداً بات .. حارساهو دبابات
كضاب وكضابات .. هواب وهوابات
شن حزبك الويحيد .. وضرعاتك ام حجبات
طظ .. جبهتك وين سيد ... الإشتراكي الفات
لا البوت ولا النبوت .. لا التوت ولا الكهنوت
ونقل الفلاشا أفاد
وكان يحكمونا بيوت .. لو بحكمونا أفراد
حارين حديث الموت .. والبعث والميعاد
كل لحظة روح بتفوت .. وكل لحظة كم ميلاد
وعلتنا يا مسخوط .. مو اسم الله واحنا عباد
علتنا كيف القوت .. والجيهة والمشهاد
ما مر قطراً توت .. ما طال للبراد
الشغلو الكلو زيوت .. ما يلقى زيت لا زاد
ما يلقى الطِّري .. وضاقنبو السبل
العجل العري .. النار والبقل
خيري وسكري .. في الدقن ام قمل
يا الدقن ام قمل
شيلي وصدري .. وجيبي دمار دبل
زير ولباش كيري .. شامبو دلال وفل
غني وشكري .. يا كوز المثل
في الضيق منهري .. وحمدك الربل
وبت السمكري .. جيهتك للرجل
دهناً كركري .. الطلح الكحل
هوي يا العسكري .. غيرك من قبل
عامل فنجري .. وفاكر الناس هبل
بى اسم الدين يطل .. وبى أسمى المثل
يرغي وينفعل .. ضاحك بالعقل
ما داعب طفل .. لو..لو قالو كل
ينفرطق نعل .. في المرة والرجل
قاصد ننشغل بي سنن الغسل
عن موية وأكل .. لا توب لا في ضل
نقعد ننكتل .. في اوصاف الرسل
مين برعى الإبل .. وتبرا الغيمة ضل
والمن دوب طفل .. يفتي ويشفي غل
والوكتين يطل .. يلفح للعقل
حيلتك ما بتحل .. في فكرك عطل
زهدنا فاض فضل .. وما ناقصين مثل
وين يوجعنا وين .. ماك داريبو كل
ما شعنف دقين .. شنف حالنا ذل
عيشة يا مفتري .. ويوم كامل شغل
نسرق ننكري .. ولا بلاش تكل
غني وشكري .. يا كوز الدبل
زير ولباش كيري .. والآية بــ رطل
بس يا عسكري ..
يا عسكري التالفين .. ويا تالف العسكر
يا لايصاً في يمين .. والشعب قد أيسر
ما جف ساق ابريل .. اكتوبر الأخضر
يات شيمة ليهو تشيل .. كل ما الرياح تكتر
فرعو الهطيط بيميل .. بس ما بينكسر
يتسامى دغري عديل .. كلما الرياح تنتر
طير الخطى الجايين .. ما بتفزعو الهزات
لا صقورك النازات ..
من دم رعاف الطين .. ودنس الحياة ام لذات
فاكر رقبتك مين ... وفاكرنا مين بالذات
دي القرشي .. قاسم أمين .. ويا دا الشفيع ما فات
وما اعظم الجايين .. يا اتبره وجايات
حاضرنا ما ضنّين .. وكل الدروب صاحيات
يا لابساً كم وش .. على مين تدور وتحوم
شغلك ضلالي وغش .. نضمك عسل مسموم
قاصد عيونو تتش .. ويرغى البلد مقسوم
طقّت جبهتو شمس .. فارت في راسو دموم
الجاي بعدو يمش .. يعتب بعيد مكروم
تطفش طيورو تطش .. وبومك يعشعش شوم
يا ضاحكاً غياظ .. لي شعبك المأزوم
ظنك ليالي حراز .. ما دلدل الخروم
في مزارعو .. لافي رذاذ .. لاغيمة طاشة تحوم
لا زيت ولا أمباز .. قطّن مصانعو عموم
وانعكنن الإفراز .. وقد بلغت الحلقوم
وبرضك تنوني انقاذ .. ينقذنا منك يوم
بيناتو نمشي عزاز .. زي النبي المختوم
يا ضاحكاً غياظ .. لي شعبك المأزوم
من دكة التلفاز .. دايماً تطل ملخوم
وتنطاير الإنقاذ .. وزبدك يرك متخوم
عرب الكنانة حجاز .. مستقبلن مهموم
عشمان في كوتة جاز .. عربونا كم قدوم
من لذتك تنحاز .. مع غزو ما له لزوم
كان ماك نتن لذاذ .. فتان ولخبات كوم
شن غزتك في عكاظ .. شعب الكويت مو الروم
لا قصباً لا عكاز .. وقت الدميرة تقوم
لاك نافعاً حجاز .. وشن للعتاب واللوم
فوق العليك لاواز .. تشهد سما الخرطوم
غماز ويا لماز .. هماز ويا مفصوم
ما الفرق بين ملوك .. كادى الرعية تلوك
وعسكر وراهو بنوك .. ساوى الغلابا حنوك
طول النهار عوك .. عوك والليل تراب وصكوك
تملا وتفضي تنوك وتملص ضميرا هنوك
واسترني يا المبروك متل التكني أبوك
ناس بي أخوي وأخوك لا اخلاق لا دين لا سلوك
اخلاق ..دين وسلوك
يرمي الولد في الشوك أما البلد مشكوك
يا شعب يسلم فوك .. عطفك رضاك وعفوك
قول للخزين صل صوم ولا تنكسر مهزوم
ولو فضلت الخرطوم من تصحى قبل الطير
بعد النجيمة تنوم
ومنعاشى يا طيبة بخير مكفية راجية اليوم
ممنوع عليها السير غير لى كبار القوم
والسادة الأمجاد ..
لابد من يجي يوم ساعاتو ما ها بعاد
يجي من صراع اضداد
من امة حق الموت ما لا قيا وانتو سعاد
قول للدعي المتخوم
يا متفن التفاح .. وشغلك قيافة ونوم
في شعبك الكداح .. وفي أطفال مو لاقى الدوم
يا أرزقي ومرتاح .. ما جابهنو هموم
جاييك زمن كتاح .. جاياك رياح وغيوم
جاياك مطور الصاح .. جاي الصح المعلوم
من كل فج في كفاح ..ومو وحدا الخرطوم
البيننا بينك دم .. تاراً غريق وجراح
فينا البحرفو السم .. فينا البكفو سلاح
شهدانا ما قت كم ... لا ياتو فيها فلاح
لا ارتحت شلت الهم .. لكنو يا سفاح
لا الإندلق بنخم .. لا بتتوزوز أرواح
ان النفوس جم .. جم
ود الفضل ما راح .. وما طال فينا شهيد
عصيان وإضرابات .. ما بنفع التشريد
لا بجدي صالح خاص .. لا مسخك الشعبي
وغنايك الرقاص .. لا دفاعك الحزبي
لا حيلة ابن العاص .. لا السجن لا التهديد
يابوت ولاد الناس أشراف وما بتنداس ..
ما بمشي فيها وعيد .. وفيها الوعد متراس ..
فيها العشق صنديد .. وصاد أعزلاً دواس ..
يا أرذلاً رعديد .. يا أبخس الأنجاس
وسع مجاري الدم .. زيد السجن ترباس
يا هالكاً مجراس .. مصاص خزا ومصاص
خازوق بني العباس ..
زي ما انت عندك دين افريقيا ليها تراث
وكان تنهري وتنغاظ .. عبداللطيف والماظ ..
ما حرضم النخاس
يا رباية المنظمة .. المريبة المسجمة
دي البلد طيبة ملهمة .. ما بتزوّر ملاحما
كنتِ خدرا ومنسمة .. جنة طيبات مواسما
يا ارض جاك مسيلمة .. في ايدو كيزان مخرمة
فاضية فاضية ومعلمة الله من دين ولا انتما
بين دهاليز مضلمة .. وبي مراويد مسممة
تشتك وانتي مرغمة .. يا أرض صابك العمى
وكل شيء طار السما .. إلا المطر طار من السما
وما اكتفى السفه انعما .. دكن السفة دردمة
وقال نشرع نأسلما .. وفي البداية النقسما
ويا كضب .. لا بتقسما .. لا بتقدر تأسلما
ويا كضب .. لا دا بلسما .. لا ترابيك مرهما
كلكم ملة مجرمة .. والبلد في البيكرما
في الغلابة المنظمة .. في نقابات مصادمة
أو جماعات مقاومة .. من خصوم المساومة
واللا أحزاب مصمة .. سلطة الفرد تهدما
من أساسا وترايما .. وبالبنوك المرمرمة
من عرقنا ومخمخمة .. مافي خير غير نأمما
إلا وجعة ملاحما .. الغلابة المألمة
تنزع السلطة بالدمى .. وأي ثورة نقيما
الكروش المنعمة .. كش تلملم تخمخما
تصحى ذاتا المرخمة .. وللعساكر تسلما
دايرة فعلاً مأزمة .. إلا لابد لازما
يا الغلابة المأزمة .. من تجارب تعلما
من دروباً تقدما .. والديمقراطي أسلما
هو البوضح معالما .. والمعالم تفهما
إنو سبة مظالما .. في الارض ماهي في السما
ولو دي أفضل عوالما .. يبقى في خيلها مكرمة
ولو دي أفضل عوالما .. يبقى غييرا لازما
وعِن تلملم عزائما .. غيرا ما بيبقي حاكما
شعبنا وفارس الحمى .. ينطلق بي ملاحما
تصبح الدنيا سالمة .. والخلائق مسالما
الحبيب للحبيبة ما .. من عساكر نقاسما
شعبنا وفارس الحمى .. ينفرد بي ملاحما
الحبيب للحبيبة ما .. للعوارض يقاسما
منك براء .. ألديش إيمانو والإخلاص
يا سم بنوك العيش .. يا أرزقي ولحاس
ايد تقبض البقشيش .. وايد ترشي للحراس
يا كرشك القدر ايش .. واكبر فراغ الراس
ماك جايي منقذ ايش داعي الهلاك للناس
شن داعي للفتيش .. حالة الطواريء وفاس
حظر التجول ليش .. ليش كتمة الأنفاس
وليش جايي أصلاً ليش .. يا جايي من غير ساس
ما قابلك دقيش .. جوة القطر .. في الباص
حال حلة تشكي دغيش .. ما عشتو ها الإحساس
لا جُعْ لبست الخيش .. لا سهدك قراص
أطفال حفايا تكوس .. للموية في الحصحاص
يوم ما لبست البوت .. في هيصة الأعراس
تعب البرد والصيف .. حمى النفس والراس
طيب حتقدر كيف .. تلمس قضايا الناس
نار المدن والريف .. الضمة ما بتنقاس
كم نفنفت نفنيف والأقوى منك فات
فاكر الحكم طرطيش .. والسلطة قوة راس
كتيل رقاب في دغيش .. حميس جهالة حماس
مو رقصة يا درويش .. عليق بخور ونحاس
ملينا شعب وديش .. ملو الأرض والفاس
الهبة تبقى بشيش .. والحيطة من فد ساس
قول للحرامي بريش .. حلتنا مو تكساس
دم اخويا مو معليش .. وانا ماني نايم حاس
وين تمشي وين شقيش .. اترك برا القصاص
واهلي الغبش ديش ديش .. وكل البلد حراس
ديل نحنا مانا قريش .. وماك ود اخو العباس
والشعب ماهو قشيش .. حالك يصيدو يباس
وسوداننا ماهو حويش .. بيقفلو وبي ترباس
اماتي يا أمات .. قولن لكل عنيد على شعبنا وعاناد
قولنلو نحنا حديد زي المرمة شداد
وين تمشي يا رعديد .. وانا يا دا يا جلاد
جيت من قريب وبعيد .. من ادنى قول في البيد
وآخر فرع غابات
هبة رجال و ولاد
نسوان عزاز وبنات
أجداد وحبوبات
جيتك بكل جنس .. أحيانا والأموات
جيتك بكل لغة .. رطان وصاحب ضاد
جيتك هجمة السيل .. مطراً بلا ميعاد
لكني ما جيت ليل .. جيت في الضحى الوقاد
وما فوقي إلا نشيد ..
وما تحتي إلا ثبات ..
ما في إيدي إلا الأيد شعباً جنا حوبات
وين تمشو يا أوغاد ..يا شرزمة كابات
خانت ثرى الأجداد
بي 300 زول في خمشة دبابات
بدل البطمن خوف وبدل البيلم شتات
بدل البسند الجوف صفيق ومؤتمرات
بدل المدارس جات تملأ البلد ثكنات
بدل القلم رصاص بدل الفهم خوذات
محضر بدل كراس جيهة النشيد غارات
حس رنة الاجراس ابواق وصفارات
تمريناً للجمباز
بدل الشباطة ابوات الحصة كتم انفاس
درس العصر كشات
فتش بيوت الناس واستجوب الاموات
جز الفرع بالفاس ام العرق هيهات
انقاذ وما ادراك انقاذنا الاهلاك
انجاز وما اسماك تكويشة الملاك
يا مسخرة مأفون ترباية السفاك
يا مدعي وافاك زمبارات القصبة
حيكومتكم كعبه
بموروث الشعب والبسملة مغتصبة
ضراعات العمال الزراع الكتبة
سارقين لبس الديش باسم الشعب الطلبة
يا شناق القول يا ربط العقبة
يا خناق الزول يا كسار الرقبة
كنا بنأكل فول نرجى الله في الكربة
مر علينا الحول ضِقنا وضُقنا الادبة
وانت تجب كف كف تنضم لمن تغبى
مؤتمرات السف شكل لجان الضيبه
شنفت الاحزاب قت كوفية وعذبة
الجمعية ضراب زي الما منتخبة
حق الله الاضراب وأي حقوق مكتسبة
قلتو سياسة غاب
طيب لية يا كذبة ما وفرتو القوت ها الحالة الصعبة
ما وقفتو الموت والنهب البى قلبة
دقن فرشة البوت فوق جوطة وغلبة
ولانزيف الدم منو عمارة وعربة
وشر العيشة الغم ليكم خير يا كسبة
كسبة وضلاليين لي بنوكم الخربة
تحيو وحلاليين وللغير حرام وربا
السلطة للاحزاب الشعب ساقا غبا
ولي حزبكم ده ثواب جاء من الله جابو هبة
بجيهة الله الجاب وبجيهة الله ابى
لي بيتو انتو قراب من بحرى بقببا
تنفرج امدرمان والمهدى في الكنبه
تنشايت ام ضبان ود الترابى واباء
فوق تربة السودان في ضرايحو كم غرباء
يا ملعبة كيزان دنيا وبلاش غلبة
وجيتاً ظهرتي بيان يا اتبرا التعبة
ما ضاقت الاديان والدنيا كم رحبة
وفي حضرتك فتيان ما بدلت جببا
الدروشة الغليان الهمهمات غضبا
وكم دوبت بمبان بمواقفا الصلبة
يا ملطشة فرعون
موسى الشوارع عاد
وعلى مين تحلقوا دقون كان اتخلقتو جداد
الشعب كلو عيون الأمة بالارصاد
اللي ضميمتو يخون ما امنوهو بلاد
وكان بيحكمونا بيوت لو بيحكمونا افراد
يا شعبنا الوقاد يا صاحب اعتى جهاد
يا ابن الغلابة الحر يا جيهة يا مشهاد
كتر السكات بيضر وقت المهادنة فات
بيك يا النضال المر تحلى البواكر هات
ايدك لعالم حر والتنهض الكلامات
طول ما الضلالة تضر زي ما هى جات بتمر
يا مفدر الظلمات يبقى اللقى بيسر
والمهدى حي ما مات
يا اتبرا الِبرة يا منجم الثورات
اتبرا ……. اتبرا

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مكتبة أشعار حميد

مُساهمة من طرف أحمد ودالأحمر في الجمعة ديسمبر 04, 2009 7:51 pm

براءة



براءة السبحة والمصلاية والإبريق
ضرا القبلتان .. الصنة والقرآن
صحائفنا السماوية .. مواريثنا .. جوامعنا .. وكنائسنا
فقر شيخنا .. ونقود السيد المطران
براءة الكدح الصالحين .. من الفقرا الصح الزينين
جميع النفس ما عابت .. ولا خابت .. بإسم الدين
ولا إتغابت عن الجيران .. ولا خانت بيوت الطين
على الرسل الكرام الحب .. على الواقعين وراهن رب
عليهن حب من الرحمن
على سدرةً ضريحا يكب
سحاب الرحمة والغفران
آهة جديرة بالتمجيد .. وبي نعمة جنان رضوان
ولكن يابا يا سودان .. نحرقو حريق .. عدو الإنسان
في أي مكان .. في أي زمان
في أي قناع تستر جا
بأي طريق .. وتوب فستان
تحت يات صورة ما فرقت .. ولو كانت هي الأديان
شوارع بقتك مرقت .. عدو الإنسان .. عدو الرحمن
فلا ترحم ذمم حرقت تياب الواحد الديان
وللإنسان أخد تارك من السود وشي دارك .. شوا الأوطان
فمن شارك .. ومن بارك .. هما سيان
هنا الشرعية كيلتنا .. عدوك ما خرب الميزان
عرفناك للدموم حقان .. ولكن دمنا الترع .. يروح ساكت .. يروح مجان؟
ده ما ممكن ولا بيكون ولا إنكان
إذا سألونا عن كرري .. جسارة الماظ .. بسالات أربعة وعشرين
عن القرشي وصحابو العزل الطيبين
عن الدرديري والأنصار
عن أم درمان شمال وجنوب
رفاقة هاشم الحبوب
شفيع الأمة .. عن جوزيف .. عن المحجوب
دماء ماريل .. مشاعر جملة الشهداء .. المشو الجايين مدى الأزمان
إذا نشدونا عن من نفذوا التاريخ بريح الدم
عن القيلي .. وعن عثمان
عن الكدرو .. عن الكرار .. رفاقتو الجم
عن الفضل السوادو كتم
سواعدو ( ) صنم
( ) يا تم
عذاب السم
عمن صان كتالو على ( ) وقالا بغم
بإطمئنان نقبل وين من أنفسنا ونقع شقيش من الأوطان
وشن حا نقول لأطفالنا .. ونساءنا وجملة الحبان
يا مارق الدم من الموية .. يا فارق اليافطة من دلقان
أخد تارك .. تعلم من قساوة الدنيا وإنضامن من الغربان
هنا الشرعية كيلتنا .. عدوك ما خرب الميزان
عدوك يا سيدي يا سودان
جميع الحملوهو أمانة .. قام خرم الأمانة وخان
فسخنا .. شيحك في الشمس .. نام إتباهى بالعمران
نفوساً شان تشوف الدم يقطر من حشا الشريان
تنتف بالسنون عصفور .. تشق العامرة بين إخوان
وإيداً تنفحك بالقمحة .. شان ما تنقح الوديان
عدوك الأجرة ما كفت .. عدوك السخرة والسدان
جلداً مردغك في الجهل .. في المرض البطالة عشان
يقري جناهو .. يصح معناهو .. يخارج العندو .. ينقدل .. تباري مدان
يشغلك إنت بالفارغة .. ويطول تريان
وياخد من ثراك الخير .. حصادك سوس من التمرة .. ومن الأقطان
نصيبك في الورق ما بتقرا .. بيقرأ الأرزقي التلفان
يا مقري البيقرأ عليك .. وحقك في القماش أكفان
يا حايم دواء ويكفيك .. وكلٌ من عليها فان
عدوك واضح وضوح البروة والنار الدم القيزان
عدوك وماهو خابي عليك .. عدوك فاشية الجرذان
وهنا الشرعية كيلتنا .. عدوك ما خرب الميزان
وزولك فتشو بتلقا .. ما بين السجن والسجان
ما بين الرفد والتجريد .. ما بين الهبة والعطيان
محنتب بي غضب وإيمان
بنصر الشارع الطالع .. وشعبو وديشو في الميدان
يصبح ظلمة الواقع .. يفتح للترى العميان
فيا فاشية الكيزان ..
هنا الشرعية كيلتنا .. وفي كيل أصدق من الميزان
هو الإنسان
مقدم بي هدى الماضي العظيم الشان
مجرتق بي وفاء الحاضر .. محصن بي ضرا الإنكان
مضرضر بي دم الشهداء ورضا الحبان
محمد بي صفاح باكر على زولة اسمها (السودان)

avatar
أحمد ودالأحمر
عضو مجتهد
عضو مجتهد

ذكر
عدد المساهمات : 28
33026
السٌّمعَة : 0
تاريخ التسجيل : 02/12/2009
العمر : 39

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى